Ҳомиджон дамла Ишматбеков: Аллаҳ таалаға бенделердиң сүйиклиси - мүсийбет келгенде сабыр, немат берилгенде шүкир ететуғынлары

Хабар бергенимиздей, бүгин елимиздеги бир топар белгили уламалардың Қарақалпақстан Республикасына сапары басланды. Ѳзбекстан мусылманлары басқармасы баслығының биринши орынбасары Ҳомиджон дамла Ишматбеков сапар даўамында дǝслепки сапарды Нѳкис қаласындағы “Имам ийшан Муҳаммад” жоме мешитинен баслады.

Дǝслеп, жǝмǝǝт пенен пешин намазын оқыды. Соң устаз мешит қǝўимине диний-мǝрипий темада баянат етти.

Ҳомиджон дамла баянаты даўамында жыйналғанларға диний тараў басшылары ҳǝм Диний басқарманың мийнет жǝмǝǝтиниң сǝлем ҳǝм дуўаларын жеткизди. Кейин мешит жǝмǝǝтине журтымызда болып атырған ѳзгерислер, ǝсиресе, диний-мǝрипий тараўдағы жаңалықлар ҳаққында айтып ѳтти. Кейининен динимизде шүкирлик мǝселесине тоқталып, тǝсирли баян етип берди.

Ҳақыйқаттан да, Қураны кǝриймниң бир қанша аятларында шүкир етиўшилерди мақтаған. Атап айтқанда, Бақара сүресинде: Ҳәй ийман келтиргенлер! Егер Аллаҳға ғана сыйынсаңыз, сизлерге ырысқы етип берген пәк нәрселерден жең ҳәм Оған шүкир қылың!”, деп марҳамат етиледи (Бақара сүреси, 172-аят).

Саид ибн Жубайр разияллаҳу анҳудан рǝўият етиледи, ол адам сондай деген: “Бенделердиң Аллаҳ таалаға сүйиклиси шүкирли ҳǝм сабырлы бенде - мүсийбет келсе, сабыр етеди, немат берилсе, шүкир етеди” (Имам Аҳмад ҳǝм Имам Табарий рǝўиятлары).

Шүкирдиң пазийлетлеринен жǝне бири, инсан шүкир қылса, рысқы жǝне де зыядаласады. Бул ҳаққында ҳǝзирети Әли разияллаҳу анҳу былай деген: “Немат шүкирине, шүкир болса зыядалыққа байланыслы болады. Сол себепли бенде шүкир қылыўды даўам етер екен, Аллаҳ таала да зыяда қылыўда даўамлы болады” (Имам Байҳақий рǝўиятлары).

Аллаҳ таала бǝршемизди шүкир етиўши бенделерден қылсын!

Мǝрипий сǝўбет сораў-жуўапларға жалғасып кетти. Сǝўбетлесиў жуўмағында ийгиликли дуўалар етилди.

Ѳзбекстан мусылманлары басқармасы баспасѳз хызмети.

  • 335 мәрте оқылды

Paziylet.uzҚарақалпақстан мусылманлары қазыяты веб-сайты