Мүнǝсибет: Социаллық тармақларда тарқатылып атырған айырым хабарлар ҳаққында

Усы күнлерде айырым сайтлар ҳǝм социаллық тармақларда Ѳзбекстан мусылманлары басқармасы баслығы, муфтий ўазыйпасына ким сайланыўы ҳǝм талабанлар ҳаққында түрли хабарлар дағазалнбақта. Ҳǝтте айырым социаллық тармақ жүргизиўшилери пǝлен улама муфтий ўазыйпасына тайынланды, деген мазмундағы тийкарсыз мағлыўматларды да тарқатып, халықты ѳтирик мағлыўматлар менен шалғытып атырғаны гүзетилмекте. Нǝтийжеде, сондай гǝп-сѳзлерди тарқатыў арқалы ел-журт ҳүрмет ететуғын ҳǝм сыйласық кѳрсететуғын уламалардың руўхыйлығына унамсыз тǝсир де ѳткерилмекте.

Ѳзбекстан мусылманлары басқармасы журтымыз пуқараларын ǝмелдеги жағдайды билмей турып, ҳақыйқатқа туўры келмайтуғын хабарларды тарқатыўдан сақланыўға шақырады. Соның менен бирге, ҳǝммени ѳзиме қаратаман ямаса күзетиўшилеримниң саны кѳбейеди, деп ѳтирик информация тарқатыў болса журналистик этикасына да, социаллық тармақ жүргизиў ǝдебине де, динимиз тǝлийматына да қарсы екенин мǝлим етеди.

Соның менен бирге, Ѳзбекстан мусылманлары басқармасы усы тема ǝтирапында тийкарсыз талас-тартысты ѳмирин халқымыз ҳǝм муқǝддес динимиз хызметине бағышлаған марҳум муфтий Усмонхон Темирхон улы ҳǝзиретлериниң ѳмирден кѳз жумғанына кѳп ѳтпеген бир дǝўирде кѳбейтиўди диний, миллий ҳǝм ǝпиўайы инсаныйлық қǝдириятлары кѳз қарасынан ǝдепсизлик ретинде баҳалайды ҳǝм де пуқараларымыздан бундай ҳǝрекетлер етпеўин сорайды.

Атап ѳтиў керек, Ѳзбекстан мусылманлары басқармасы республика аймағында рǝсмий хызмет алып барып атырған исламый диний шѳлкемлердиң орайлық басқарыў органы болып, мусылманлардың бирлигин тǝмийинлеўге хызмет етеди. Усы мақсетте, фиқҳта Ҳанафий мазҳабы ҳǝм исенимде Имам Мотуридий тǝлийматы тийкарында мѳмин-мусылманлар ушын барлық шǝрт-шǝраятларды жаратады. Соның менен бирге, Ислам илимин кең ен жайдырыў, мешит-медреселер шѳлкемлестириў, диний ǝдебиятларды басып шығарыў, халық аралық шѳлкемлер ҳǝм белгили уламалар менен шерикликти ǝмелге асырады.

Ѳзбекстан мусылманлары басқармасы Уставының тийисли бǝнтинде тийкарынан Диний басқарма баслығы, муфтий Уламалар Кеңеси жыйналысында бес жыл мүддетке сайланады. Муфтий лаўазымына сайланып атырған шахс Ѳзбекстан Республикасы пуқарасы, жоқары диний мағлыўматқа ийе, кеминде он жыл Ѳзбекстан мусылманлары басқармасы системасында ислеген, уламалар ҳǝм де халық арасында абырай ҳǝм исенимге ийе болған болыўы керек.

Усы күнлерде муфтий лаўазымына мүнǝсип талабанларды ҳǝр тǝреплеме кѳрип шығыў, мийнет жолын үйрениў, билим дǝрежесин талқылаў, жумыс тǝжирийбелерин бақлаў ҳǝм халық арасындағы абырай-итибарына баҳа бериў жумыслары алып барылмақта. Усы ис-ҳǝрекетлердиң жуўмағы ҳаққында Ѳзбекстан мусылманлары басқармасының рǝсмий баспасѳзинде дағазаланады.

Ѳз гезегинде соны да айтыў керек, бул мǝселеде интернеттеги еркинлик себепли исламый нормаларды естен шығарыў да дурыс емес. Аллаҳ таала Қураны Кǝриймде: Ол бир сөз айтса, әлбетте, оның алдында таяр турыўшы ҳәм бақлаўшы (сөзди жазып алыўшы периште) бар”, деп баянлаған (“Қоф” сүреси, 18-аят).

Бул аяты кǝриймадан бүгин жазғанларымыз ертең ѳзимиздиң пайдамыз ямаса зыянымызға ҳүжжет болыўы аян болмақта. Ҳǝр бир сѳзимизди жазыўға ҳǝрекет етер екенбиз, санамызда Аллаҳ таала ҳǝм Оның Расули бизди ескерткен каламы, Ислам дини кѳрсетпелери пайда болса, сѳз айтыў жуўапкершилигин жǝне де тереңирек аңлаған болар едик... Ҳақ таала бǝршемизди туўры жолдан адастырмасын.

Ѳзбекстан мусылманлары басқармасы Баспасѳз хызмети

  • 964 мәрте оқылды

Paziylet.uzҚарақалпақстан мусылманлары қазыяты веб-сайты