Баспасѳз ҳǝм ҒХҚ хызметкерлери күни мүнǝсибети менен байрам илажы ѳткерилди

Ѳзбекстан мусылманлары басқармасы 27-июнь - “Баспасѳз ҳǝм ғалаба хабар қураллары хызметкерлери күни” мүнǝсибети менен мǝрипий илаж ѳткерди. Онда 100 ге жақын мǝмлекетимиздеги баспасѳз, телевидение, радио, интернет сайтлары, бирге ислесиўши шѳлкемлердиң информация хызметлери хызметкерлери ҳǝм блогерлер қатнасты.

Илаж Қураны кǝрийм тилǝўаты ҳǝм жақсы дуўалар менен басланды.

Илажда Муфтий Усмонхон Алимов ҳǝзиретлери сѳз сѳйлеп, былай деди:

“Сиз ǝзиз дѳретиўшилик мийнет жǝмǝǝтин “27-июнь - Баспасѳз ҳǝм ғалаба хабар қураллары хызметкерлери күни” мүнǝсибети менен шын кеўилимнен қутлықлайман. Ҳақ тааладан бǝршеңизге саў-саламатлық, дѳретиўшилик ислериңизде табыс ҳǝм ǝўметлер, шаңарақларыңызға бахыт, тынышлық-қǝтержамлық, берекет тилеймен. Ҳүрметли Президентимиздиң басламасы менен кѳпшилик тараўлар қатары ғалаба хабар қураллары жумысларын да тǝн алыўға ылайық жаңалықлар ҳǝм ѳзгерислер енгизилди.

Аллаҳ таалаға шүкир, мүбǝрек динимизди кең ен жайдырыў, диний-мǝрипий жумысларды халқымызға толық жеткизиўде Сиз сыяқлы дѳретиўши инсанлардың үлкен орны бар, ǝлбетте.

Мѳмин-мусылманлар мǝпи, дин ғамы ҳǝм Ўатан тǝғдирин жүрегинен ѳткерип ислейтуғын Сиздей дѳретиўши инсанлардың сѳзлери, ибратлы ислери мақтаўға ылайық. Қуранда сондай деп марҳамат етиледи: «(Ҳәй Муҳаммад!) Рәббиңниң жолына (динине) ҳикмет ҳәм жақсы нәсият пенен шақыр! Олар менен ең шырайлы усылда тартыс! Әлбетте, Рәббиң Өзиниң жолынан ким адасқанын жақсы биледи. Ол ҳидаят тапқанларды да жақсы биледи» (Наҳл, 125).

Сол себепли дѳретиўшилерди Аллаҳ тааланың мине усындай шақырығына ǝмел еткен ҳалда жақсылықты жайыў, илим-мǝрипатты тарқатыўда ең гѳззал усылды таңлаған ҳалда мүмкиншиликлерден ѳнимли пайдаланыў керек болады.

Атап ѳтиў керек, соңғы жылларда мǝмлекетимизде ǝмелге асырылып атырған реформалар ҳаққындағы мағлыўматларды ўақытында усыныў, халыққа оператив ҳǝм толық информация жеткизиў, ашықлық ҳǝм ǝшкаралықты тǝмийинлеўде үлкен нǝтийжелерге ерисилди.

Ҳǝзирги күнде баспасѳз хызметкерлери оғыры ǝҳимийетли шахсларға айланып үлгерди. Жǝмийетшилик олардың баянатын күтеди, оларды излейди ҳǝм қǝдирлейди.

Ғалаба хабар қураллары хызметкерлерин жǝне де белсендиликке, батырлыққа ҳǝм оперативликке шақырған болар едим. Бул кǝсип ийелери ең зǝрүр ўақытта, ең зǝрүр ҳǝм ҳақ гǝпти айтыўы керек. Ғалаба хабар қураллары хызметкерлери тек ғана текст жазыўды, бǝлки заманагѳй медиа усылларынан кең пайдаланыўлары да зǝрүр болады.

Ҳǝзирги қурамалы дǝўирде ғалаба хабар қураллары, атап айтқанда, журналистлер, блогерлердиң тығыз бирге ислесиўи, кǝсиплик жағынан бирге ислесиўи, қалыслығы да үлкен ǝҳмийетке ийе болмақта. Журналистлер қолды-қолға берсе, жақсы идеялар ǝтирапында бирлессе, ойлаған мақсетлеримизге жетемиз, инша Алла.

Мүмкиншиликтен пайдаланып, оғада зǝрүрли ҳǝм жуўапкерли ўазыйпаларды ǝмелге асырыўда барлық ғалаба хабар қураллары ўǝкиллери, информация саласында жумыс ислеп атырған жанкүйерлеримизге Ҳақ тааладан саў-саламатлық, күш-ғайрат ҳǝм де үлкен табыслар тилеймен.

Барлық дѳретиўши хызметкерлерди тағы бир мǝрте кǝсиплик байрамлары менен қутлықлайман. Қǝлемиңиз ѳткир, сѳзлериңиз туўры, шығыўларыңыз тǝсирли болып, мудамы мѳмин-мусылманларымыз ардағында болың, бǝршеңизге бахыт, дѳретиўшилик табыслар яр болсын”.

Соннан кейин байрам илажына жыйналған барлық ҒХҚ хызметкерлери, журналистлер, интернет сайтлары редакторлары, белгили блогерлер, баспа хызметкерлери ҳǝм жуўапкер шѳлкемлер ўǝкиллерине жыллы сѳзлер айтылған қутлықлаўлар ҳǝм естелик саўғалары тапсырылды.

Дин ислери бойынша комитет баспасѳз хызмети, “Янги Ўзбекистон”, “Халқ сўзи” газеталары редакциялары, Ѳзбекстан Миллий информация агентлиги, “Ҳидоят сари” кѳрсетиўи дѳретиўшилери ѳз жумысларындағы айырқша мийнетлери ушын Ѳзбекстан мусылманлары басқармасы баслығы, муфтий Усмонхон Алимов ҳǝзиретлериниң қолынан алғыснамаларды қабыллады.

Илажда Ѳзбекстан Журналистлери дѳретиўшилик аўқамы баслығы Олимжон Ўсаров сѳзге шығып, ҒХҚ хызметкерлерин кǝсиплик байрамы менен қутлықлап, тараўдың хызметкерлери күни мүнǝсибети менен Ѳзбекстан мусылманлары басқармасы басшыларына миннетдаршылық билдирди.

Илаж жуўмағында муфтий ҳǝзиретлери тǝрепинен ғалаба хабар қураллары ўǝкиллерине дѳретиўшилик табыслар, диний тараўдың, ўатанымыздың раўажланыўы ҳǝм халқымыздың мǝнǝўиятын кѳтериўди Ҳақ тааладан сорап, жақсы дуўалар етилди.

Қатнасыўшылар естелик ушын сүўретке түсти.

Ѳзбекстан мусылманлары басқармасы Баспасѳз хызмети

  • 1336 мәрте оқылды

Paziylet.uzҚарақалпақстан мусылманлары қазыяты веб-сайты