«ҲҮЖДАН ЕРКИНЛИГИ ҲӘМ ДИНИЙ ШѲЛКЕМЛЕР ҲАҚҚЫНДА»ҒЫ НЫЗАМ ЖОЙБАРЫ БИРИНШИ ОҚЫЎДА ҚАБЫЛЛАНДЫ

Нызамнан пуқаралардың жǝмийетлик орынларында ибадат либасларында жүриўине жол қойылмаўы ҳаққындағы шеклеў алып тасланып атыр.

Бүгин, 15-сентябрь күни Олий Мажлис Нызамшылық палатасының жалпы жыйналысы болып ѳтти. Онда Әдиллик министири Русланбек Давлетов парламентке «Ҳүждан еркинлиги ҳǝм диний шѳлкемлер ҳаққында»ғы Ѳзбекстан Республикасы Нызамының жаңа редакторлаўдағы жойбарын усынды.

Нызам жойбары депутатлар тǝрепинен кѳрип шығылып, биринши оқылыўында қабылланды ҳǝм Сенатқа жиберилетуғын болды.

«Русланбек Давлетов Нызам жойбарының ҳǝзирги күндеги актуаллығы ҳаққында тоқталар екен, ѳткен дǝўир даўамында пуқаралардың диний исенимин ǝмелге асырыўда дус келип атырған машқалаларды сапластырыў, диний тǝлим алыўды ҳǝм диний шѳлкемлердиң еркин хызмет кѳрсетиўин тǝмийинлеў, динлер аралық ҳǝм миллетлер аралық келиспеўшиликлердиң алдын алыўға хызмет етиўин айтып ѳтти.

Усы Нызам жойбарының тийкарғы мақсети ҳүждан еркинлиги кепилликлерин күшейтиў, ҳǝр бир инсан қǝлеген динге исениўи ямаса ҳеш қайсы динге исенбеў ҳуқықын тǝмийинлеўдиң жаңа механизмлерин енгизиў, соның менен бирге, мǝмлекеттиң дин ислери бойынша сиясатын жетилистириўден ибарат», - делинеди Әдиллик министирлиги хабарында.

Киритилип атырған ѳзгерислерге тийкарынан, халықты қыйнап киятырған мǝселелерден бири - пуқаралардың жǝмийетлик орынларында ибадат либасларында жүриўине жол қойылмаўы ҳаққындағы шеклеў алып тасланып атыр.

Әмелдеги «Ҳүждан еркинлиги ҳǝм диний шѳлкемлер ҳаққында»ғы Нызамға муўапық, диний шѳлкем дүзиў ушын басламашылар саны 100 адам болыўы талап етилген болса, киритилип атырған ѳзгериске тийкарынан ендигиде жергиликли диний шѳлкемди дизимнен ѳткериў ушын 50 басламашы жеткиликли есапланады.

Нызамға киритилип атырған жаңалықлардан бири - диний шѳлкемлерди мǝмлекет дизиминен ѳткериў тǝртип-қағыйдалары жеңиллестирилмекте, атап айтқанда, усыныс етилетуғын ҳүжжетлер саны қысқартырылмақта, оларды нотариал ҳǝм басқа кѳринислерде тастыйықлаўға тийисли талаплар бийкар етилип атыр, мǝмлекет хызметлерин толық электрон кѳринисте ǝмелге асырылыўы енгизилип атыр, дизимнен ѳткериўди бийкар етиў тийкарлары анық белгиленип атыр.

Алдын Дин ислери бойынша комитет нызам жойбарында нǝзерде тутылған жаңалықларды толық санап ѳткен еди.

Нызам Сенат тǝрепинен мақулланып, кейин президент қол қойғаннан кейин, рǝсмий дағазаланғаннан кейин күшке киреди.

«Ҳүждан еркинлиги ҳǝм диний шѳлкемлер ҳаққында»ғы нызам жаңаланып атыр. Қандай ѳзгерислер бар?

#ҳүждан еркинлиги


  • 190 мәрте оқылды

Paziylet.uzҚарақалпақстан мусылманлары қазыяты веб-сайты