Рǝсмий мүнǝсибет: “Шарли Эбдо”дағы карикатура бойынша

Усы жыл 2-сентябрь күни Париж қаласында 2015-жылдың 7-январьында “Шарли Эбдо” журналы редакциясына уйымластырылған ҳүжимге байланыслылықта айыпланып атырған 14 адам үстинен суд иси басланды. Усы мүнǝсибет пенен усы журнал редакциясы Пайғамбарымыз Муҳаммад алайҳиссаламға тийисли карикатураны қайтадан басып шығарды.

Усы карикатура баспадан шығарылыўы мусылман ǝлеминде түрли келиспеўшилик ҳǝм наразылықларға себеп болып атыр. Атап айтқанда, Египеттеги Ал-Азҳар университети усы карикатураны басып шығарғаны ушын “Шарли Эбдо” редакциясын қаралап баянат пенен шықты. Баянатта бундай карикатураларды биле-тура қайтадан баспадан шығарыў мѳмин-мусылманлардың сезимлерин қозғаў, иртки салыў ҳǝм мусылманлардың диний қǝдириятларына ҳүжим екени айтылады ҳǝм де бул жағдай мусылманлар тǝрепинен қатты қараланыўы билдириледи.

Сол орында, Ѳзбекстан мусылманлары басқармасы усы исти қаралап, Пайғамбарымыз саллаллаҳу алайҳи ўа салламның абырайын тѳгиўге қаратылған жағдайды халықлар ортасындағы ѳз-ара татыўлықты бузыўға қаратылған иртки, ѳз гезегинде, адамлардың диний исеними менен байланыслы сезимлерин ақырет, диний қǝдириятларды аяқ асты қылыў, миллетлер ҳǝм динлер аралық кек оятыў, деп баҳалайды.

Соны атап ѳтиў зǝрүр, ким болыўына қарамастан Расулуллаҳ саллаллаҳу алайҳи ўасалламды ҳǝр қанша кемситиўге урынбасын, бул иси менен мүбǝрек динимизге ямаса Оның ишки дүньясына азғантай болса да зыян жеткизе алмайды. Ислам тарийхынан кѳриў мүмкин, Пайғамбарымыз саллаллаҳу алайҳи ўа саламды ѳлтириўге умтылған Ҳаким ибн Ҳизомни кеңпейиллик пенен кеширип жиберген. Сүйикли ағайыны болған Ҳамза ибн Абдулмутталибти ѳлтирген жаўызды кеширип жиберген. Булар сѳзсиз, Қураны кǝриймдеги: “Әпиўди қабыл етип ал, жақсылыққа буйыр, наданлардан жүзиңди бур!” (Аъроф, 199) кѳрсетпесиниң ǝмелдеги тастыйығы.

Солай екен, бундай ҳǝрекетлерге басқыншылық кѳринисинде емес, бǝлки Набий алайҳиссаламға тǝн мүлǝйимлиқ, басықлық ҳǝм зийреклик пенен мүнǝсибет билдириў керек. Сонда жаман нийетли айырым биреўлер тǝрепинен халықлар, миллетлер, динлер ортасына жǝнжел урығын шашыў мақсетинде уйымластырылып атырған ҳǝр-түрли кѳринистеги ирткилер, түрли ҳийлелерге Пайғамбарымыз алайҳиссаламға тǝн жолды тутқан боламыз.

Ѳзбекстан мусылманлары басқармасы.

  • 121 мәрте оқылды

Paziylet.uzҚарақалпақстан мусылманлары қазыяты веб-сайты