КЕЎИЛ БИЛДИРЕМИЗ

Ѳзбекстан мусылманлары басқармасы Уламалар Кеңеси Қарақалпақстан Республикасы Жоқарғи Кеңеси баслығы, Ѳзбекстан Республикасы Олий Мажлиси Сенаты Баслығының орынбасары Ерниязов Муса Тажетдиновичтың қайтыс болыўы мүнǝсибети менен терең қайғырыў билдиреди.

Марҳум Муса Ерниязов мийнет жолы даўамында бай билим ҳǝм үлкен тǝжирийбеси, инсаный пазийлетлери менен халқымыздың кеўилинен терең орын алған инсан еди. Қарақалпақ үлкесинде кейинги жылларда жүз берген барлық ѳзгерислер Муса Ерниязовтың искерлиги менен беккем байланыслы.

Жетпис үш жасты қарсылаған Муса Ерниязов Қарақалпақстан үлкесинде жеделлик пенен алып барған ибратлы искерлиги бǝршеге үлги болды. Мешит-медреселерди қурыў, зыяратгаҳларды абаданластырыў ҳǝм имам-хатиблерди қоллап-қуўатлаў сондай-ақ, медресе студентлерине мүнǝсип шараятларды таярлаў бойынша күтǝ үлкен ислер ǝмелге асырылды.

Әсиресе, Нѳкис қаласындағы медресемиз журтымыздағы ең үлгили диний билим журты есапланады. 2018-жылда ѳткерилген Республика қарыйлар жарысының улыўма жеңимпазы да ǝйне мине усы үлкеден шыққаны пикиримизди қоллап-қуўатлайды.

Ҳақыйқаттан да, Ислам динимизде ѳмири узақ болып, саўаплы ǝмеллер еткен инсанлар кѳп мақталған. Абдураҳман ибн Абу Бакре разияллаҳу анҳудан, ол ǝкесинен рǝўият етеди: “Бир адам: “Ҳǝй, Аллаҳтың Расули! Инсанлардың қайсысы абзал” - деди. Сонда саллаллаҳу алайҳи ўасаллам: “Ѳмири узақ болып, ǝмели шырайлы болғаны” - деди (Имам Термизий рǝўияты).

Бир ҳǝдийси қудсийда: “Ҳǝй Адам перзенти! … Әлбетте, Мен сизлердиң сүўретиңизге де, шырайыңызға да қарамайман. Бǝлки кеўилиңизге қарайман ҳǝм сизлердеги жақсы пазийлетлерден разы боламан”, деп айтып ѳткен.

Ҳақыйқаттан да, марҳум Муса Ерниязов та ǝне сондай ийгиликли пазийлетлер ҳǝм жақсы ǝмеллерлер ийеси еди.

Аллаҳ таала Бақара сүресинде сондай марҳамат етеди:

«Сабырлыларға хош хабар бериң, олар ѳзлерине мүсийбет жеткенде «Әлбетте, биз Аллаҳтыкимиз ҳǝм ǝлбетте, биз Оған қайтамыз», деген».

Солай екен, Ҳақ таала марҳумның шаңарақ ағзаларына, перзентлерине ҳǝм жақынларына шырайлы сабыр берип, бул мүсийбетлерин жақсылықлар менен толтырсын.

Меҳрийбан ҳǝм реҳимли Аллаҳ таала қǝдирданымыз Муса Ерниязовты Ѳзиниң рахметине алсын. Биз Уллы Пǝрўардигардан дуўа етип сораймыз, марҳум бирадарымызды Ѳзиниң шексиз рахметине, жǝннет бағларына алсын.

Иннаа лиллааҳи ўа иннаа илайҳи рожиъуун.

Усмонхон АЛИМОВ,

Ѳзбекстан мусылманлары басқармасы баслығы, муфтий

  • 217 мәрте оқылды

Paziylet.uzҚарақалпақстан мусылманлары қазыяты веб-сайты