Қурбан Ҳайыты күни ҳǝрекетлениў күн даўамында толық тоқтатылады, байрам шаңарақта ѳткериледи.

Ѳзбекстанда 2020-жыл 31-июль күни пүткил сутка даўамында Республика кѳлеминде ҳǝрекетлениў, автотранспорт қуралларының, жѳнелиссиз таксилердиң ҳǝрекети толық тоқтатылады. Бул ҳаққында Республика арнаўлы комиссиясы мǝлимлемесинде белгиленген.

Қурбан ҳайыты байрамы шаңарақта ѳткерилиўи усыныс етилген.

«Ѳзбекстан мусылманлары басқармасы Уламалар Кеңесиниң Қурбан ҳайытын коронавирус пандемиясы дǝўиринде карантин талапларына муўапық ѳткериў ҳаққындағы баянаты мағлыўмат ушын қабылланды ҳǝм жергиликли ҳǝкимликлерге тийисли илажларды ǝмелге асырыў бойынша тапсырма берилди.

Пуқараларға Қурбан ҳайытының карантин талапларына муўапық, үй шараятында, шаңарақта, дǝбдебесиз ҳǝм ықшам, тǝртипли ҳǝм де халқымыздың миллий қǝдириятларына уйқас түрде карантин қағыйдаларына қатаң ǝмел еткен ҳалда ѳткериў усыныс етилди», делинеди комиссия мǝлимлемесинде.

Буннан алдын президент қарары менен Ѳзбекстанда Қурбан ҳайыты байрамы 31-июль күни нышанланыўы белгиленген еди. Байрам илажлары карантин қағыйдаларына қатаң ǝмел еткен ҳалда ѳткерилиўи мǝлим қылынған еди.

Июль айы басында Ѳзбекстанда 10-июльдан 1-августқа шекем қатаң карантин енгизилген еди. Бүгин, 26-июль күни Республика арнаўлы комиссиясының нǝўбеттеги шешими менен карантин 15-августқа шекем узайттырылды.

Ендиликте 15-августқа шекем той, шаңараққа тийисли дǝстүрлер ҳǝм басқа илажлар ѳткерилмейди, дем алыў бағларындағы аттракционлар, улыўма аўқатланыў объектлери, шаштǝрезханалар ҳǝм гѳззаллық салонлары жабықлығынша қалады.

Дерек: Kun.uz

  • 287 мәрте оқылды

Paziylet.uzҚарақалпақстан мусылманлары қазыяты веб-сайты