Қорғаныў нықап (медициналық маска) лары тарқатылды

Ҳәммемизге белгили, 2019-жылдың декабрь айы орталарында Қытайда жабайы ҳайўан ҳәм теңиз ҳайўанлары сатыўшыларының бир топарында өткир дем алыў жоллары кеселликлери, гриппке уқсас белгилери менен кеселлер анықланып, раўажланыў нәтийжесинде бир неше мәмлекетлерге тарқалып кеткен еди. “COVID-19” атлы усы кеселликтиң алдын алыў ушын елимизде бәрше қорғаныў илажлары әмелге асырылып атыр.

Тилекке қарсы, Ўатанымызда да усы кеселлик анықланды. Белгили болғанындай, ҳәзир дүнья бойлап коронавирус инфекциясының (COVID-19) тарқалыўы халқымызды да қәўетерге салмақта.

“COVID-19” кеселлигиниң алдын алыў мақсетинде қолда бар имканиятлардан, жергиликли исбилерменлердиң қәўендердик жәрдеминен пайдаланып, Қарақалпақстан мусылманлары қазыятына қараслы мешит имам-хатиблери тәрепинен орынлардағы кем тәмийинленген шаңарақлар, нәгиранлар ҳәм жәрдемге мүтәж пуқаралар ҳалынан хабар алып, оларға сақаўатлық жәрдемлер берди.

Мине бул қайырлы исти даўам етиў мақсетинде 23-март күни Нѳкис Имам ийшан Муҳаммад жәмаатлик мешити имам-хатиби ҳәм мешит хызметкерлери тәрепинен Нѳкис қаласы орайлық дийқан базарында қарыйдар ҳәм саўдагерлерге бийпул қорғаныў нықапларын тарқатты.

Бундай қайырқомлық әмеллер республикамыздың бәрше орынларында даўам етпекте. Себеби, қыйын ўақытта бир-биреўге инсаныйлық, қайырқомлық жәрдемлер бериў муқәддес динимиз кѳрсетпелеринен.

Қарақалпақстан мусылманлары қазыяты.


  • 132 мәрте оқылды

Paziylet.uzҚарақалпақстан мусылманлары қазыяты веб-сайты