ХОШ ХАБАР! Пәтиўа мәселесинде жаңа инновациялық сайт иске түсти!

Ѳзбекстан мусылманлары басқармасы мѳмин-мусылманлардың диний мазмундағы сораўларына қолай ҳәм тез жуўап алыўын тәмийинлеў мақсетинде, интерактив ҳәм инновциялық хызметлерди ѳз ишине алған fatvo.uz сайтын иске түсирди. Усы сайт диний сораў-жуўаплар бағдарында ең заманагѳй хызметлерди ѳзинде жәмлегени менен айрықша әҳимийетке ийе есапланады.

Алдағы ўақытта, усы сайттан пайдаланыўшылар шаръий мәселелерге тийисли ѳз сораўларын сайттың “Сораў жибериў” бѳлими арқалы жоллаўлары мүмкин. Сораў текстине аудио, видео ҳәм сүўретлер қосымша ретинде усыныў мүмкиншилиги де жаратылған. Берилген сораўларға пәтиўа саласында жетерли билим ҳәм жоқары илмий тәжрийбеге ийе болған қәнигелер тәрепинен толық жуўаплар қайтарылады.

Сайтта “Ақыйда”, “Пәклик”, “Намаз”, “Ораза”, “Закат”, “Хаж ҳәм умра зияраты”, “Неке”, “Талақ”, “Саўда”, “Ант ҳәм нәзир”, “Ижара”, “Ҳадал-ҳарам”, “Руўхий тәрбия” ҳәм сол сыяқлы актуал рубрикалар астында жуўаплар жәрияланып барылады. Китапхана бѳлиминде диний мазмундағы китап ҳәм қолланбалар жайластырып барылады. Медиа бѳлминде уламалардың диний сораўларға берген видео ҳәм аудио жуўаплары жайластырылған.

Пайдаланыўшылар “Излеў” түймеси арқалы ѳзлери ушын зәрүр болған темалардағы әмелдеги шаръий сораў-жуўапларды таўып, оқыўы мүмкин.

2020-жыл 10-март күнинен баслап усы сайт тест режиминде ѳз жумыс искерлигин баслады.

Келешекте усы сайтты пәтиўа ҳәм шаръий мәселелер бағдарында энциклопедиялық дерекке айландырыў нийетимиз бар. Бул ийгиликли исти Сиз әзиз оқыўшыларымыз бенен бирге әмелге асырамыз, иншааллаҳ!

Ѳзбекстан мусылманлары басқармасы Баспасөз хызмети.

Даўытбай Беканов таярлады.

  • 170 мәрте оқылды

Paziylet.uzҚарақалпақстан мусылманлары қазыяты веб-сайты