БИЛИМ ЖУРТЫМЫЗДА АШЫҚ ЕСИКЛЕР КҮНИ (АТА-АНАЛАР МӘЖИЛИСИ) БОЛЫП ӨТТИ

«Бүгин заман тез пәт пенен өзгерип атыр. Бул өзгерислерди ҳәммеден де көбирек сезетуғын ким – жаслар. Мейли, жаслар өз дәўириниң талаплары менен уйғын болсын. Лекин соның менен бирге өзлигин де умытпасын. Биз, кимлермиз, қандай уллы инсанлардың әўладымыз, деген шақырық олардың қәлбинде бәрқулла жаңлап, өзлигине садық қалыўға баслап турсын. Буған нениң есабынан ерисемиз? Тәрбия, тәрбия ҳәм тек ғана тәрбия есабынан».

Шавкат Мирзиёев.

Бүгин Нөкис Муҳаммад ибн Аҳмад ал-Беруний орта арнаўлы ислам билим журтында Ашық есиклер күни болып өтти. Онда билим журты устаз-оқытыўшылары, топар басшылары, талаба-жаслар ҳәм ата-аналар қатнасты.

Ашық есиклер күнин өткериўден тийкарғы мақсет талабалардың тәрбиясына еки тәреплеме (оқыў орны ҳәм ата-аналар тәрепинен) итибарды және де күшейтиў, ата-аналарды перзентлериниң тәлим-тәрбия алып атырған оқыў орны шәрт-шараятлары менен жақыннан таныстырыў, оқыў даўамында өзиниң белсендилиги, сабаққа қатнасы ҳәм сабақты өзлестириўде көзге көринген талабаларды және де руўхландырыў ҳәм оларды хошаметлеў, топар басшылары ҳәм ата-аналар менен бирге ислесиўди турақлы алып барыў арқалы, талабаларды еки тәреплеме қадағалаўды жолға қойыў, 2019–2020-жылларға мөлшерленген шәртнама төлемлери ҳәм мүддетлери менен таныстырыў болып есапланады.

Қураны кәрийм тиләўаты ҳәм дуўа менен басланған илажды билим журты Руўхыйлық ҳәм ағартыўшылық ислери бойынша директор орынбасары

А. Ережепов кирис сөз бенен ашты ҳәм алып барды. Атап айтқанда, бүгинги күни елимизде диний тараўда алып барылып атырған өзгерислер, жаңаланыўлар, ҳүкиметимиз тәрепинен ислам билим журтларына қаратылып атырған итибар ҳәм олардағы жаратылған шәрт-шараятлар ҳаққында сөз етти.

Қалаберсе, жақында ғана Президентимиздиң Пәрманы менен Өзбекстан мусылманлары басқармасы баслығы, муфтий ҳәзрет Усманхан Алимовтың «Эл-юрт ҳурмати» ордени менен сыйлықланыўы ҳүкиметимиз тәрепинен диний тараў ўәкиллериниң алып барып атырған қайырлы ис-илажлары мүнәсип баҳаланып, хошаметленип атырғанының айқын дәлили екенлиги ҳаққында сѳз етти.

Усы мүнәсибет пенен билим журты руўхыйлық ҳәм ағартыўшылық ислери бойынша директор орынбасары да билим журты жәмәәти ҳәм ата-аналар атынан устазымыз, муфтий ҳәзретин қутлықлады.

Сондай-ақ, ол өз сөзинде ата-аналарға мүрәжат етип:

«Биз жәмийетке кәмил ҳәм жетик инсанларды тәрбиялап жетистирмекши екенбиз, ең дәслеп, сиз ата-аналар тәрепинен берилетуғын тәрбия менен, биз устазлар тәрепинен берилетуғын билимди уйғынластырыўымыз ҳәм тәрбия менен билимди теңдей алып барыўымыз керек», – деп атап өтти.

Соң сѳзге билим журты оқыў ислери бойынша директор орынбасары С. Кудайбергенов шығып, талабалардың оқыў барысында әдеби, минез-қулқы ҳәм сабақларды ѳзлестириўдеги дәрежеси ҳаққында ата-аналарына мағлыўматлар берди.

Сондай-ақ, бүгин ата-аналар ушын китап ярмаркасы шѳлкемлестирилип, онда диний-ағартыўшылық тараўдағы бир қатар китаплар, соның менен бирге устазымыз Ш. Бауатдинов авторлығындағы китаплар менен де таныстырылды.

Буннан кейин ата-аналар перзентлери билим алып атырған оқыў орнының шәрт-шараятлары менен жақыннан танысты. Бул жердеги оқыў ханалары, компьютер ханалары, китапхана, асхана, спорт зал, жатақхана ҳәм жуўыныў ханаларында жаратылған шараятлар менен танысып, перзентлери қай жерде ҳәм қандай шараятта тәлим алып атырғанының гүўасы болды. Бул жаратылған имканиятлар ушын олар Ѳзбекстан мусылманлары басқармасы, Қарақалпақстан мусылманлары қазыятына ҳәм билим журты басшыларына ѳз миннетдаршылығын билдирди.

Илаждан соң мийманлар түслик дастурханына мирәт етилди.


А. Ережепов.

Билим журты руўхыйлық

ҳәм ағартыўшылық ислери

бойынша директор орынбасары


  • 550 мәрте оқылды

Paziylet.uzҚарақалпақстан мусылманлары қазыяты веб-сайты