Тоғыз айдың жуўмағы қаралды

9-октябрь күни Қарақалпақстан мусулманлары қазыятының жыллық ис режеси бәнтлериниң орынланыўы ҳәм өткен тоғыз айдың жуўмағы бойынша бәрше мешит имам-хатиб ҳәм хызметкерлери қатнасында жыйналыс болып өтти.

Онда Қарақалпақстан мусылманлары қазыяты қазысы Ш.Бауатдинов усы жылы 9-10-сентябрь күнлери Ташкент қаласы «Шайх Муҳаммад Садық Муҳаммад Юсуф» комплексинде Республикада социаллық руўхый орталықты және де саўалландырыўда диний тараў ўәкиллериниң орны ҳәм ўазыйпалары мазмунында өткерилген илажда, сондай-ақ, Өзбекстан мусылманлары басқармасының 14-сентябрь күнги 2471-санлы хатына тийкарланып Ташкент халық аралық Ислам академиясында Өзбекстан мусылманлары басқармасының орынлардағы ўәкиллери, бәрше имам-хатиблер қатнасыўында өткерилген еки ҳәптелик тәжирийбе асырыў оқыў-курсында айтылған мәселелер, тойларды тәртипке салыў ҳаққындағы қарарда көрсетилген тапсырмалар ҳәм белгиленген ўазыйпалар менен кеңнен таныстырды.

Жыйналыста қазыятқа қараслы бәрше мешит имам-хатиблери тәрепинен усы жылдың тоғыз айы даўамында исленген мәнаўий-мәрипий илажлар, ғалаба хабар қуралларындағы шығыўлар, мешитлердиң қурылыс-ремонт ҳәм абаданластырыў жумыслары, жаназа мәресимлерин шәриат көрсетпелерине сай өткериў, шаръий некени муўапықластырыў ҳәм басқа да режеден тысқары жумысларының есабатлары тыңланды, жиберилген қәте-кемшиликлер сынға алынды ҳәм алдағы ўақытлары бундай кемшиликлерди болдырмаў ушын көрсетпелер берилди.

Илаж соңында қазы Ш.Бауатдинов Ташкент халық аралық Ислам академиясында Өзбекстан мусылманлары басқармасының орынлардағы ўәкиллери, бәрше имам-хатиблер қатнасында өткерилген тәжирийбе асырыў оқыў-курсында оқып қайтқан республикамыздағы бас имамларға сертификатлар тапсырды.

Қайрат Иманалиев, Қарақалпақстан мусылманлары қазыяты хызметкери.

  • 122 мәрте оқылды

Paziylet.uzҚарақалпақстан мусылманлары қазыяты веб-сайты