Тойлар бойынша комиссия баслығы: «Дәбдебели той берип атырғанларға жынайый жуўапкершилик кәр етпеўи мүмкин. Оларды халық алдында шерменде етиў керек»

20 сентябрь күни, Олий Мажлис Сенатында “Тойлар, шаңараққа тийисли байрамлар, садақа ҳәм дәстүрлер өткерилиўин тәртипке салыў системасын және де жетилистириў ҳаққында”ғы қоспа қарардың орынланыўын тәмийинлеў бойынша дүзилген комиссияның биринши жыйналысы болып өтти.

Онда Әдиллик министри орынбасары Худаёр Мелиев қарар талапларын бузғаны ушын белгиленетуғын жуўапкершилик ҳаққында айтты.

«Жуўапкершилик мәселеси, жәрийма муғдары қанша болыўы ҳаққында анық тоқтамға келингени жоқ. Кодекске өзгертиў киргизиў ҳәм тағы басқа шөлкемлестириў жумыслары бар. Биринши нәўбетте, қарардың мазмун-мәнисин орынларға жеткизиў керек. Әдиллик министрлигиниң ең төмен бөлимлерине шекем бул қарар жиберилген. Жуўапкершилик, әлбетте, белгиленеди және бул 2020 жылдың 1 январынан күшке киреди. Бәлким, жәрийма белгиленер, бәлки басқа түрдеги жуўапкершиликке тартылар», - деген Мелиевтиң сөзлерин келтирди Кun.uz хабаршысы.

Комиссия баслығы Иқбол Мирзо да жуўапкершилик мәселесинде өз мүнәсибетин билдирди. Оның айтыўынша, орынларда бул тема бойынша сораў берилгенде нызамшылықтағы ең жоқары жәрийма муғдары нәзерде тутылып атырғанын айтып өтиў керек.

«Дәбдебели той берип атырғанларға ҳәкимшилик яки жынайый жуўапкершилик қоллаў онша пайда бермеўи мүмкин. Оларды ғалаба хабар қураллары арқалы көрсетип, пүткил халық алдында шерменде етиў керек», деди Иқбол Мирзо.

Дерек: Кun.uz сайты.

  • 106 мәрте оқылды

Paziylet.uzҚарақалпақстан мусылманлары қазыяты веб-сайты