Атинайылардың билимин жетилистириў оқыў-семинары басланды

Жәмийетимизде атинайылардың билимин және де асырыў, оларды журтымызда әмелге асырылып атырған үлкен реформалардан хабардар етиў ҳәм де ўазыйпаларына жуўапкершилик пенен қараў мақсетинде 16-сентябрь күни Нөкис Имам ийшан Муҳаммад жоме мешитинде Республикамызда хызмет көрсетип атырған атинайылардың еки ҳәптелик билимин жетилистириў оқыў-семинары басланды.

Семинарда Өзбекстан халық аралық Ислам Академиясы оқытыўшы У. Палўанов, Өзбекстан халық аралық Ислам Академиясы Қарақалпақстан Республикасы аймақлық филиалы директоры А. Абибуллаев, Қарақалпақстан мусылманлары қазияты қазысы Ш. Бауатдинов ҳәм Қарақалпақ Мәмлекетлик Университети профессоры Ж. Сағындиқовлар қатнасты.

Қарақалпақстан мусылманлары қазыяты қазысы Ш. Бауатдинов бүгинги күнде журтымызда диний тараўда алып барылып атырған кең реформалар ҳәм бунда атинайылардың тутқан орны ҳаққында айтып, ҳәзирги күнде жумыс системасын жолға қойыўдағы кемшиликлер, ҳаялларға тийисли социаллық мәселелер шешимин шешиўде атинайылар жуўапкершилигиниң артыўы, бунда олардың билим потенциалларын раўажландырыўдың да әмелге асырылыўы зәрүр болған илажлар ҳаққында өз алдына тоқталып, уллы бабаларымыздың бай илимий мийраслары бойынша айтып өтти.

Илаж даўамында жәмийетимизде атинайылардың ўазыйпалары шеңбериниң кеңейгенлиги, олар тек ғана диний билимлер ийеси емес, бәлки елимиздеги унамлы өзгерислер, экономикалық, билимлендириў ҳәм басқа тараўларда алып барылып атырған түпкиликли өзгерислер, жәмийетимиз руўхый, диний турмысында болып атырған жаңаланыўлардың белсенди қатнасыўшыларына айланыўы керек. Сол мақсетте атинайылар искерлигин және де жетилистириў, олардың билимлерин арттырып барыў мақсетинде оқыў-семинарлары шөлкемлестирилип атырғанлығы ҳаққында Өзбекстан халық аралық Ислам академиясы оқытыўшысы У. Палўанов айтып өтти.

Даўытбай Беканов Қарақалпақстан мусылманлары қазыяты хызметкери.

  • 226 мәрте оқылды

Paziylet.uzҚарақалпақстан мусылманлары қазыяты веб-сайты