Ҳажыларымыз елимизге жетип келди

“Ҳаж” сөзи сөзликте “нийет қылыў” мәнисин аңлатады. Шарьий истилаҳ (түсиник) та ҳаж арнаўлы әмеллерди белгили орынларда, арнаўлы бир ўақытларда орынлаў дегенди билдиреди.

“Арнаўлы әмел” Байтуллаҳты таўап етиў ҳәм Арафатта турыў.

“Белгили орын” Кааба ҳәм Арафат.

“Арнаўлы бир ўақытлар” ҳаж мәўсими, яғный Шаўўал, Зулъқада ҳәм Зулхижжа айының он күни болып табылады.

Ҳаж ҳижрий жыл есабы бойынша тоғызыншы жылда парыз болған. Ҳәр бир мөмин ҳәм мөмина өмиринде бир рет ҳаж етиўи парыз. Шараят ҳәм мүмкиншилик болғанда кешиктирмей ҳажды ада етиў керек.

Алдын хабар бергенимиздей 31-июль күни Республикамыздан 138 пуқара ислам дининиң ақырғы парызын ада етиў ушын Саудия Арабстаны Мәдина қаласына жөнеп кеткен еди.

Ҳүкиметимиз тәрепинен жаратылған имканиятлар ҳәм қолайлықлардан нәтийжели пайдаланып, ҳаж әмеллерин ада етип, елимизге жетип келди. Оларды Нөкис халықара аэропортынан Қарақалпақстан Республикасы Министрлер Кеңеси, Қарақалпақстан мусылманлары қазыяты, Муҳаммад ибн Ахмад ал Беруний медресеси ҳәм басқа да мекеме, шөлкем ўәкиллери, ғалаба хабар қураллары хызметкерлери күтип алды.

«… Ҳаж ибадаты әмеллерин ада етиўде үлкен имканиятларды ҳәм қолайлықларды жаратып берген ҳүрметли Президентимизге, ел басшыларына үлкен рахмет. Ибадат даўамында ҳеш қандай машқалаларға дусласпадық, ҳәммеси кеўилдегидей. Бәрше ҳажыларымыз миннетдар. Ибадат әмеллеринде елимиздиң тынышлығы буннанда беккем болыўы, дийқанларымыздың қырманы бәлент болыўы ушын дуўалар еттик», дейди елликқалалы Мамбетова Хуржан апа ҳәм шоманайлы Турганбаев Сатбай ағалар.

Ҳажыларымыз өзлерин күтип алыўда ҳәм шығарып салыўда инсаныйлық жәрдемлерин берген Нөкис халықара аэропорты ҳәм жол ҳәрекети қәўипсизлиги басқармасы мийнет жәмәәти, Қарақалпақстан мусылманлары қазыяты хызметкерлери ҳәм Нөкис медресеси оқытыўшыларына өзлериниң миннетдаршылығын билдирди.

Қарақалпақстан мусылманлары қазыяты.

  • 141 мәрте оқылды

Paziylet.uzҚарақалпақстан мусылманлары қазыяты веб-сайты