Әдиллик министрлиги ўәкиллери қатнасында семинар өткерилди

Бүгин Қарақалпақстан мусылманлары қазыятына қараслы бәрше мешит имам-хатиб ҳәм найып-имамлары қатнасында семинар болып өтти. Семинарға Қарақалпақстан Республикасы Әдиллик министри орынбасары Э.Турсунов ҳәм министрликтиң аға мәсләҳәтшиси И.Алдабергеновлар қатнасты.

Э.Турсунов Өзбекстан Республикасы Президентиниң 2018-жыл 13-апрел күнги ПҚ 3666-санлы «Өзбекстан Республикасы Әдиллик министрлиги жумысын және де жетилистириўге тийисли шөлкемлестириў шәра-илажлар ҳаққында»ғы қарардың мазмун-мәниси, диний шөлкемлерди қайта дизимнен өткериў бойынша Әдиллик министрлиги тәрепинен әмелий жәрдемлер бериў ҳаққында кең түсиниклер берди.

Бүгинги күнде Өзбекстан Республикасында түрли конфессияға тийисли диний шөлкемлер жумыс алып барыў менен бирге, пуқараларымыз өз диний әмеллерин еркин орынлап атырғанлығы, диний шөлкемлер өз ҳәрекетлерин әмелге асырыўы ҳәм мәмлекет турмысында белсене қатнасыўы ушын барлық шәраятлар жаратылған. Бул бойынша ҳуқықый тийкарлар Өзбекстан Республикасы Конституциясының 31-статьясында, “Ҳүждан еркинлиги ҳәм диний шөлкемлер ҳаққында”ғы нызамда өз көринисине ийе екенлиги, диний шөлкем жумысларын устав тийкарында әмелге асырыў, қайырқомлық жәмәәтлик фондлардың жумыслары, оларды сапластырыў тәртиби, диний либаслар ҳәм диний ибадатлар ҳаққында министрликтиң ағы мәсләҳәтшиси, 2-дәрежели юристи И.Алдабергенов айтып өтти.

Диний шөлкемлердеги айрым машқалалар ҳәм сораўларға имам-хатиблер толық жуўаплар алды. Семинарды Қарақалпақстан мусылманлары қазыяты қазысы Ш.Бауатдинов басқарып барды.

Қарақалпақстан мусылманлары қазыяты.
  • 200 мәрте оқылды

Paziylet.uzҚарақалпақстан мусылманлары қазыяты веб-сайты