Жерлеслеримиз ҳаж зияратына жөнеп кетти

Ислам дини бес үстин (тийкар) үстине қурылған болып, ҳаж ибадаты солардың бесиншиси есапланади. Тарийхый дереклерден билгенимиздей, ҳаж етиў ибадаты Пайғамбарлар атасы Ибраҳим (а.с) Аллаҳ тааланың әмри менен Байтулаҳты қурған, оның тийкарын салғаннан берли басланған еди.

Расулу Акрам (с.а.ў) бир ҳәдиси шәриплеринде: яғный: «кимде-ким ҳаж ибадатын толық ада етип, қадаған етилген ислерден өзин сақлаған болса (фахш ҳәм өтирик-өсек сөзлерди айтпаса) анасынан жаңа туўылған күниндегидей гүналарынан пәк болған ҳалда қайтады» деп марҳамат қылады.

Муқәддес динимиздиң бесинши парызын ада етиў мақсетинде 31-июль күни Республикамыздан 135 пуқара мүбәрек Ҳаж зияратына Нөкис аэропортынан жөнеп кетти.

Оларды шығарып салыўда Қарақалпақстан Республикасы Министрлер Кеңеси баслығы орынбасары, Қарақалпақстан мусылманлары қазыяты, Нөкис Имам ийшан Муҳаммад жоме мешити ҳәм Муҳаммад ибн Ахмад ал Беруний атындағы орта арнаўлы ислам билим журты ҳәм ғалаба хабар қураллары ўәкиллери қатнасты.

«Ҳаж — 2019» мәўсиминдеги Қарақалпақстан Республикасынан кеткен 135 пуқараларымызға Қарақалпақстан мусылманлары қазыяты хызметкери Даўытбай Беканов, Әмиўдәрья районы «Хажы ийшан» жоме мешити имам-хатиби Ражапбай Ҳабибуллаев ҳәм Кегейли районы «Сүйин ийшан баба» жоме мешити имам-хатиби Изтилеўов Қутлымуратлар басшылық етип кетпекте.

Еслетип өтемиз бул жылғы пуқараларымыз Ташкент-Нөкис-Мадина жөнелиси менен Нөкис халықаралық аэропортынан Саўдия Арабстанының Мадина қаласына жөнеп кетти.

Аллаҳ таала бул пуқараларымыздың еткен ибадатларын, елимиздиң тынышлығы ҳәм раўажланыўы жолында қылған дуўаларын өз даргаҳында қабыл еткей…


Қарақалпақстан мусылманлары қазыяты

  • 190 мәрте оқылды

Paziylet.uzҚарақалпақстан мусылманлары қазыяты веб-сайты