КИТАПЛАР ПРЕЗЕНТАЦИЯСЫ "ҚМУ"ДА

КИТАПЛАР ПРЕЗЕНТАЦИЯСЫ: ЖАҢА КИТАПЛАР САЎҒА ЕТИЛДИ


2019-жылы 21-май күни Бердақ атындағы Қарақалпақ мәмлекетлик университетинде Қарақалпақстан мусылманлары қазыяты қазысы, Муҳаммад ибн Аҳмад ал-Беруний орта арнаўлы ислам билим журты директоры Шамсуддин Баҳауддинов авторлығындағы ҳәм қарақалпақ тилине аўдарылған бир неше китапларды таныстырыў мәресими болып өтти.

Онда Қарақалпақстан мусылманлары қазыяты ўәкиллери, университет профессор-оқытыўшылары ҳәм студентлер қатнасты.

Илажды университет ректоры А.Реймов кирис сөз бенен ашты ҳәм басқарып барды. – Бизге белгили, Президентимиз жасларды мәденият, көркем өнер, дене тәрбия ҳәм спортқа тартыў, оларда хабар технологияларынан дурыс пайдаланыў көнликпелерин қәлиплестириў, китап оқыўды үгит-нәсиятлаў ҳәм ҳаял-қызларды жумыс пенен тәмийинлеў мәселесине тоқталып, тийисли министрликлер, шөлкем басшыларына тийкарғы 5 бағдар бойынша анық тапсырмалар берилип, бул бойынша бүгинги күнде елимиздиң барлық орынларында тийисли илажлар әмелге асырылмақта, усы өткерилип атырған илаж да әне усындай ийгиликли ислерден ҳәм китапқумарлықты раўажландырыўға үлес қосатуғын басламалардан есапланады, – дейди университет ректоры А. Реймов.

Буннан соң , Қарақалпақстан мусылманлары қазыяты қазысы, Муҳаммад ибн Аҳмад ал-Беруний орта арнаўлы ислам билим журты директоры Шамсуддин Баҳауддинов сөзге шығып, жақынласып киятырған Рамазан ҳайыты байрамы менен жыйналғанларды қутлықлады ҳәм дүнья цивилизациясы раўажланыўына мүнәсип үлес қосқан уллы уламларымыздың шығармаларын үйрениў ҳәм олар жазып қалдырған бийбаҳа мәдений мийрасты келешек әўладқа жеткизиўдиң бүгинги күндеги әҳмийети ҳаққында өз пикирлерин билдирди.

– Президентимиз қайсы ўәлаят ямаса аймаққа барса да, сол жердиң топырағынан жетисип белгили уламалардың бай мийрасын үйрениў, оларды турмысқ аеңгизиў, еле атлары ҳәм мийнетлери үйренилмеген уламаларды илимий жақтан изертлеў бойынша тапсырмалар бирип келмекте. Себеби, жасларды тәрбиялаўда, идеялық бослықтың орнын толтырыўда ислам тәлиматлары тийкар етип алынса, беккем иммунитет қәлиплеседи ҳәм ол ҳеш қандай иллетке жолықпайды, – дейди Ш. Баҳауддинов.

Көп жыллық мийнетлердиң нәтийжеси сыпатында Ш. Баҳауддиновтың авторлығындағы ҳәм аўдарма иси болған: “Кәмил инсан”, “Саламат ана ҳәм бала - жәмийет гиреўи”, “Ораза пазыйлети”, “Намаз оқыў қағыйдалары”, “Марҳумларға азар бермейик”, “Қурбанлық китабы”, “Сарф сабақлығы”, “Шамаили Муҳаммадия”, “Ибадати Исламия”, “Ислам мәрипаты: негиз ҳәм түсиник”, “Ислам динине улыўма тәрийп”, “Ҳаж ҳәм умра қолланбасы”, “ИШИМ фитнасы”, “Интернетке ин қурған өрмекшилер” сыяқлы онлап китаплар баспадан шықты ҳәм халқымызға инам етилди.

Жоқарыда атлары келтирилген китаплар Қарақалпақстан Республикасы Министрлер Кеңеси тәрепинен тастыйқланған реже тийкарында Республикамиздагы қала ҳәм район ҳәкимликлери, министрликлер, жоқары оқыў орынлары, мәкеме ҳәм шөлкемлерге бийпул тарқатылды

Саўға сыпатында университет мәлимлеме ресурс орайына 1000 нан артық китап университет ректоры А. Реймовқа тапсырылды.– “Қураны кәрийм мәнилериниң қарақалпақ тилиндеги аўдармасы ҳәм тәфсири” китабының қарақалпақ тилинде биринши мәрте басып шығарылыўы елимизде әмелге асырылып атырған қайырлы ислердиң даўамы есапланады ҳәм бул халқымызға әжайып саўға болды.

Әлбетте, аўдарма иси, әсиресе Аллаҳ тааланың кәламы Қураны кәриймди, ондағы аятлардың мазмун-мәнисин түсинген ҳалда аўдарыў жуўапкершиликли ҳәм машақатлы ис есапланады, – деп атап өтти Қарақалпақстан мусылманлары қазыяты қазысы Шамсуддин Баҳауддинов.

Презентация сораў-жуўаплар ҳәм қатнасыўшылардың пикир-усыныслары менен даўам етти.

  • 298 мәрте оқылды

Paziylet.uzҚарақалпақстан мусылманлары қазыяты веб-сайты