Нәўбеттеги қайырқомлық акциясы өткерилди

Ҳар қандай жәмийетте болатуғын мүтәжлерге, мискин-нәгиранларға, жетим-жесирлерге жәрдем бериў, оларға қайыр-эҳсан көрсетиў ең жоқары инсаный пазыйлетлерден бири болып, онда инсаныйлықтың ең жоқары мазмуны өз сәўлелениўин тапқан.
Қурани каримде: “Ҳәй мөминлер, мийнет етип тапқан нәрселериңиздиң ҳалал-пәкизелеринен ҳәм Биз сизлер ушын жерден шығарған нәрселерден садақа етиң!” делинген.

Өзбекстан мусылманлары басқармасы жанындағы “Вақф” қайырқомлық фонды Рамазан айы мүнәсибети менен бүгин Нөкис Имам ийшан Муҳаммад жоме мешитинде республикамыздағы кем тәмийинленген 100 шаңараққа 12 млн. 99 мың сўмға азық-аўқат өнимлеринен материаллық жәрдемлер берди ҳәм фонд тәрепинен бүгинги күнде республикамызда хызмет көрсетип турған жәми 50 мешитке Қурани карим бийпул тарқатылды.

Илажда “Вақф” қайырқомлық фонды баслығы И.Халилов фонд тәрепинен республикадағы жәрдемге мүтәж инсанларға көрсетилген материаллық ҳәм әмелий жәрдемлери ҳаққында айтып өтти. Соң Қарақалпақстан мусылманлары қазыяты қазысы Ш.Бауатдинов муқаддес динимизде ҳәмме ўақыт жәрдемге мүтәж инсанларға үлкен итибар қаратады. Олардың аўырын жеңил етиў ҳәм ҳалынан хабар алыўды ибадатлардың ең абзал дәрежесине көтереди. Пайғамбарымыз саллаллаҳу алайҳи ўасалламның ҳадислеринде мусылманлар өз ара биргеликте ҳәм татыў болыўға, жетим-жесирлерге ҳәм мискинлерден ибарат мүтәжлерге жәрдем бериўге шақырыўы ҳаққында айтып, бүгинги күндеги ҳүкиметимиз тәрепинен олар ушын жаратылып атырған имканиятлар, жеңилликлер, қабыл етилип атырған қарар ҳәм пәрманлардың инсан мәпи ушын хызмет етиўи, бундай инсанлар мәмлекет итибарында екенлиги ҳаққында айтты.

Тахиятаслы Уразымбетова Гүлнара ҳүкиметимиз тәрепинен жәрдемге мүтәж кем тәмийинленген шаңарақларға ҳәм жетим-жесирлерге көрсетилип атырған ғамқорлықлардан сондай-ақ, бүгинги илажды шөлкемлестирген инсанларға өзиниң миннетдаршылығын билдирди.

Қарақалпақстан мусылманлары қазыяты.

  • 189 мәрте оқылды

Paziylet.uzҚарақалпақстан мусылманлары қазыяты веб-сайты