МӘЎЛУД УЛАМАЛАРДЫ БИРЛЕСТИРДИ

Әйне күнлерде ǝлемлер султаны, ǝлемлер жол баслаўшысы, кѳзимиз нуры, кеўилимиз шадлығы, басымыз тажы Муҳаммад салллаллаҳу алайҳи ўа салламның мүбǝрек туўылыў сǝнелери - Рабиул аўўал айы дүнья бойлап кең байрамланып атыр.

Ѳзин мусылман билген адам, Аллаҳ тааланың «Әлбетте, Аллаҳ ҳәм Оның периштелери Пайғамбарға салаўат айтады. Ҳәй ийман келтирген! (Сизлер де) оған салаўат ҳәм сәлем айтың!» (Аҳзаб сүреси, 56-аят) аятына муўапық, мǝўлуд айының ҳǝр секундын ғǝниймет билип, Муҳаммад саллаллаҳу алайҳи ўа салламға салаўат, сǝлем ҳǝм дурудлар айтпақта.

Бул ай пүткил Ислам үмметин бир сѳз – «Аллоҳумма солли ъала саййидина Муҳаммадин ва ъала аалиҳи ва асҳабиҳи ажмаъин» - ǝтирапында бирлестирди. Себеби, кеўилинде ийманы бар адам Набий алайҳиссаламның: «Ким маған бир рет салаўат айтса, Аллаҳ таала оған он рет салаўат айтады» (Имам Муслим рǝўияты), деген сѳзлерин терең аңлап, оған ǝмел етеди ҳǝм буның нǝтийжесинде үлкен саўапларды қолға киритеди.

Кеше ғана Ѳзбекстан мусылманлары басқармасы баслығы, муфтий Усмонхон Алимов ҳǝзиретлери басшылығындағы бир топар уламалардың «Сийрат ақшамы»ндағы баянатлары қǝлблеримизди кѳтерген болса, мүбǝрек жума күни Ҳиндстанның Керала штатындағы «Сүнний мǝденият орайы» басламасы менен шѳлкемлестирген халық аралық мǝўлуд конфренциясы онлайн тǝризде эфирге узатылғаны бǝршемиздиң кеўлимизди қуўанышқа бѳледи.

Eң қуўанышлысы, бүгинги халық аралық мǝўлуд конфренциясында пүткил дүньяда қатнасқан белгили шайхлар, уламалар қатарында журтымыздың белгили уламасы, Саййид Рахматуллаҳ Термизий дамла тǝсирли баянаты менен барлық мусылманларды лал қалдырды.

Усының менен бирге, устаз Рахматуллаҳ дамла Имам Бухарий, Имам Термизий, Имам Мотуридийдай зǝбердес уламалардың мүнǝсип мийрасхоры екенин ǝмелде тастыйықлады.

Ташкент қаласы Юнусабад районы бас имам-хатиби, «Мырза Юсуф» жоме мешити имам-хатиби Саййид Рахматуллаҳ дамланың «Адамлар арасында дос-бирадарлық пайда етиў жолы жǝне бул бойынша Пайғамбарымыз саллаллаҳу алайҳи ўа саллам тǝлийматлары» темасындағы араб тилинде еткен баянатын дүньяның түрли орынларындағы мусылманлар үлкен қызығыўшылық пенен тыңлады.

Дүнья бойлап кең байрамланып атырған мүбǝрек мǝўлуд айы бǝршемизге мүбǝрек болсын. Аллаҳ таала бул ай шарапатынан, Муҳаммад саллаллаҳу алайҳи ўа салламның ҳүрметлеринен журтымызды тыныш қылсын, жǝҳǝннен, атап айтқанда, журтымыздан коронавирус бǝлесин жоқ етсин, ǝмин!

Толибжон НИЗОМ

Дерек: Vakillikuz.
  • 64 мәрте оқылды

Paziylet.uzҚарақалпақстан мусылманлары қазыяты веб-сайты