Ҳасан Басрийды жылатқан қыз

Күнлердиң биринде бир адам Ҳасан Басрий ҳǝзиретлериниң алдына келип:

- Ҳǝзиретим, Аллаҳ жолында бизге жǝрдем бериң! - деп жалынды. Имам Ҳасан Басрий:

- Қандай дǝртиң бар? Саған қандай жǝрдем берейин? - деп сорады. Ол адам сондай деди:

- Мениң жүдǝ саналы бир қызым бар, сол қызыма не болғанын билмедик, күни-түни тынбай жылайды, Қуран оқыйды ҳǝм тағы жылайды, кѳз жасын тѳге берип, кѳзи де жақсы кѳрмей қалды, енди соқыр болып қаладыма, деп қорқып атырман. Сиздан ѳтинип сорайман, үйге барып, оған нǝсият етип қойсаңыз. Ҳасан Басрий разы болып, сол адамдың үйине барды. Оның қызына:

- Қызым, неге жылайсаң? Жылай берсең, нǝзерден ажыралып қалыўың мүмкин. Ѳтиниш қылсам, жылаўыңның себебин айтасаңба? - деди.

Қыз:- Ҳǝзиретим, мен саппа-саўман, ҳеш қандай дǝртим де жоқ. Кѳзимниң соқыр болыўына еки себеп бар. Бул кѳзимиз ақырет дүньясында Аллаҳ тааланы кѳреди, ямаса кѳрмейди. Егер кѳзимиз Ҳақ тааланы кѳриў бахтына ериссе, оның ушын мыңлаған кѳз Оны кѳриўге қурбан болсын. Егер кѳрмесе, онда Аллаҳ таала Ѳзин кѳриўге мүнǝсип етпеген кѳзди соқыр қылсын. Алланы кѳрмейтуғын кѳзди не қыламан? - деди.

Ҳасан Басрий бул жуўаптан жүдǝ тǝсирленди, тынышсызланыўға түсти, кѳзинен жас қуйылды. Кейин былай деди: «Нǝсият етиўге келген едик, ѳзимиз нǝсият алдық, ҳǝким болыў ушын келген едик, ҳǝкимимизди таптық».

«Ҳасан Басрий» китабынан Миралим Мансур таярлады.

Imon.uz сайтынан Шымбай районы «Хан» жоме мешити имам-найыбы Асқар Қаражанов таярлады.

  • 99 мәрте оқылды

Paziylet.uzҚарақалпақстан мусылманлары қазыяты веб-сайты