Неге жума күни «Каҳф» сүреси оқылады?

Бир қанша мешитлерде Жума марузасы басланғанға шекем «Каҳф» сүреси тиләўат қылынады. Айырымлар, неге әйне, жума күни усы сүре оқылыўына қызығады, гейде себеби ҳаққында да бир-бирлеринен сорасып атырғанлары қулаққа еситиледи. Төменде, буның себебин билип аласыз. Келиң, дәслеп усы сүре ҳаққында қысқаша мағлыўмат берип өтсек. «Каҳф» сүреси Қураны кәриймдеги «Әлҳамду» менен басланған бес сүреден бири болып есапланады. Бул сүреде, тийкарынан тарийхый қыссаларға итибар қаратылған. 110 аяттан ибарат сүрениң 71 аяты қыссалардан ибарат. Сүреде каҳфқа (яғный, үңгирге) кирип алған жигитлер, еки бағ, Адам алайҳиссалам ҳәм Иблис, Муўса алайҳиссалам ҳәм солиҳ бенде ҳәмде Зулқарнайн ҳаққындағы қыссалар келтириледи.

Енди болса, жума күни неге, әйне усы сүре тиләўат қылыныўының пазыйлети ҳаққында төмендегилерди келтирип өтемиз:

Ҳафиз Әбиў Бәкир ибн Мурдаўайҳ Ибн Умар разыяллаҳу анҳудан рәўият қылған ҳәдисте Расулуллаҳ саллаллаҳу алайҳи ўа саллам: "Ким Каҳф сүресин жума күни оқыса, қыямет күни оның қәдеми астынан нур шығып, аспанды жарытады ҳәм оның еки жума арасындағы қәтелери кешириледи", деди.

Имам Бухарий, имам Муслим ҳәм имам Аҳмад рәўият қылған ҳәдисте Әбиў Исҳақ төмендегилерди айтады: «Әл Барроздың мыналарды айтып атырғанларын еситтим. Бир адам «Каҳф» сүресин оқый баслады. Ҳәўлиде бир ҳайўан бар еди. Сонда, ҳайўан қәўетерлене баслады. Жаңағы адам қараса, оны булыт орап турыпты. Болған ҳәдийсени Расулуллаҳ саллаллаҳу алайҳи ўа салламға айтып берген едик, Пайғамбарымыз алайҳиссалам: «Ҳәй пәленше, оқыйбер, ол Қуран тиләўаты ушын түскен сакийна (тынышлық, аманлық)», деди».

Имам Муслим, имам Насаий ҳәм имам Аҳмад Әбиў Дарда разыяллаҳу анҳудан рәўият қылған ҳәдисте Расулуллаҳ саллаллаҳу алайҳи ўа саллам: «Ким «Каҳф» сүресиниң ақырғы он аятын оқыса, Дәжжал фитнасынан сақланады», деген».

Және басқа рәўиятта: «Ким «Каҳф» сүресиниң басынан он аят яд алса, Дәжжал фитнасынан сақланады», делинген».

Жоқарыдағы ҳәдис шәрийфлерден белгили болады, жума күни усы сүрени тиләўат қылыўдың пазыйлети көп екен. Ким ҳәр жума күни «Каҳф» сүресин тадаббур (пикирлеп, мәнилерин түсинип) менен оқыса, дүнья ҳәм ақырет жақсылығына ерисетуғын екен. Демек, «Каҳф» сүресин оқыўға асығайық!

Илҳом Маърупов.

Қарақалпақ тилина аўдарған Нѳкис қаласы «Имам ийшан Муҳаммад» жоме мешити имам-найыбы Абдурашид Байджанов.

Дерек: Muslim.uz

  • 168 мәрте оқылды

Paziylet.uzҚарақалпақстан мусылманлары қазыяты веб-сайты