Динимиз мусылманларды аўызбиршиликли ҳәм бирге болыўға шақырады

Ҳәммемизге мәлим, ҳәзирги күнде дүнья жәмийетшилигин уўайымға салып турған коронавирус COVID 19 вирусы өкиниш пенен айтамыз, бизиң елимизди де шетлеп өтпеди. Мәмлекетимиз тәрепинен бул кеселликтиң алдын алыў ҳәм емлеў бойынша әмелий шаралар көрилмекте.

Әлбетте, бул күнлер Аллаҳ тааланың сынағы болып, ҳәр биримиз қолымыздан келгенинше бул жағдайға туўры қатнаста болсақ, Иншааллаҳ! бул күнлер де өтип кетеди. Бүгинги күнде социаллық тармақлар арқалы берилип атырған мағлыўматлардан көрип турыппыз, жерлеслеримиз тәрепинен бир қанша қайырқомлық илажлары шөлкемлестирилмекте. Кимдур шыпакерлердиң азық-аўқатынан хабар алып атырған болса тағы кимлер дүканлардан медициналық нықапларды бийпул тарқатып атыр. Қулласы, ҳәр ким қолынан келгенинше ҳәрекет етпекте.

Аўа, әзизлер сиз бенен бизиң динимиз болған Ислам дини мусылманларды мине сондай аўызбиршиликли ҳәм бирге болыўға шақырады. Сол орында Расулуллаҳ саллаллаҳу алайҳи ўасалламның усы ҳәдислери ядымызға түседи. «Мөминлер өз-ара реҳимли қайыр-сақаўатта, меҳир-мириўбетте бир дене киби, егер оның бир ағзасы аўырып қалса, қалған ағзалары да бул аўырыўды ысытпа ҳәм тынышсызлық пенен қарсы алады» (Имам Муслим рәўияты).

Динимиздиң бул ҳәм басқа көрсетпелерине муўапық Өзбекстан мусылманлары басқармасы тәрепинен ийгиликли иске қол урылды. Имам-хатиблер ҳәм жәрдемши имамлар ҳәм де мөмин мусылманлар тәрепинен хатми Қуранлар, зикир ҳәм дуўалар қылынды ҳәм де Аллаҳ жолына бир қанша қурбанлықлар сойылып, жетим-жесирлерге тарқатылды. Аллаҳ таала бул етилген қайырқомлық, зикир ҳәм дуўаларды Өзи қабыл етип, булардың себебинен тез күнлерде усы кеселликти арамыздан көтерсин. Әмин!

Дәрменбай Байымбетов,

Кегейли районы «Хақабад» мешити имам-хатиби.
  • 123 мәрте оқылды

Paziylet.uzҚарақалпақстан мусылманлары қазыяты веб-сайты