Дүньяның ең арқасындағы мешит ҳаққында еситкенсизбе?

69-параллел сызығында, Жер шарының ең шетинде, Таймир ярым атаўында Нурд-Камал мешити жайласқан болып, Арқа полюс регионындағы ең биринши қурылған мешит болып табылады. Ол Россияның Норилск қаласында қурылған.

Мешит татар миллетине тийисли уқыплы басқарыўшы Мидехат Нурдинович Бикмаев қаржылары есабынан қурылған болып, оған әкеси Нурдин ҳәм анасы Гайникамал атларын бирлестирип, “Нурдкамал” деп ат қойылған.

Норилск қаласында көп мусылманлар жасап, олар дерлик қала халқының үштен бир бөлегин қурайды. Олар негизин азербайжанлар, чеченлер, лезгинлар, аварлар ҳәм басқа миллетлерден ибарат. Буннан тысқары қалада сезилерли дәрежеде Орайлық Азияның өзбек, қырғыз ҳәм тәжик халықлары ўәкиллери да жасайды. Қалаберсе, Норилскте нганасан елаты (жергиликли Сибир халқының ўәкиллери) да жасайды. Олар Ислам динин қабыллаған болып, тез-тез мешитлерге қатнап турады. Бәри биргеликте Россияның узақ арқасында үлкен тәсирге ийе болған мусылман диаспорасын қәлиплестиреди.

Мешит жайласқан аймақта ҳаўаның температурасы қыс айларында - 50º дәрежеден төменге түсип кетеди. Мусылманлар болса бундай ҳаўа райына итибар бермей, мешитке қатнап, жәмәәт пенен бире ибадат етеди. Жума намазына келиўши намаз оқыўшылар саны 500 адамнан асады.

Мешиттиң қурылысы 1993 жылда басланған. Оның ашылыў мәресими 1998-жыл 19-сентябрьде болып өтти. Мешит дийўал ҳәм минары перуза реңде исленген болса, мешиттиң ханақасы ҳәм минары гүмбези алтын реңде.

Усы Мешит “Дүньяның ең арқа мешити” аты менен Гиннестиң рекордлар китабына кирген.

Аллаҳ таала барлық мешитлер қатары усы мешиттиң дәрўазасын қыямет күнине шекем ашық ҳәм мөмин-мусылманлар ушын ибадат, илим-билим мәканы болыўын нәсип етсин!

Нозимжон Ҳошимжанов.

Қарақалпақ тилине Кегейли районы «Ийшан қала» жоме мешити имам-хатиби Ғ.Нажимов аўдарды.

  • 649 мәрте оқылды

Paziylet.uzҚарақалпақстан мусылманлары қазыяты веб-сайты