Ашшы ҳақыйқатлық

Ашраф Алий Таҳонабий раҳматуллаҳи алайҳ сөзлериниң биринде усы гүрриңди келтирген:

«Англиялылар Ҳиндстанға бастырып келгенде олардың бири ѳзине үлкен жер майданын сатып алды. Жергиликли халықтан адам жаллап, сол жерден салма қаздырды. Жумыс ўақтында жумысшылардан бири мусылман адам үлкен муғдарда алтын таўып алды. Алтынның бир данасына да қыянет етпей, жер ийесине алып барып берди. Жер ийеси ҳайран болып: «Неге буннан бир бѳлегин де алмай, маған алып келдиң, егер билдирмей алып қалғаныңызда да мен билмейтуғын едим?» деп сорады.

Сонда мусылман адам: «Бул жерлер сизики, сонлықтан да бул жерден шыққан байлықлар да сизиң мүлкиңиз. Мен оларды алып кетсем де билмес едиңиз, бирақ мени кѳрип турыўшы, ақыретте меннен ҳаққыңызды сизге алып бериўши бар. Мен жоқшылыққа шыдайман, бирақ ақырет азабынан қорқаман», деди.

Жыллар ѳтип, сол англиялы ѳзи жасап турған қаланың судьялығына тайынланды ҳәм оның алдына бир адамды алып келди. Ол қулағындағы сырғаны алтын деп ойлап бир ҳаялды ѳлтирген ҳәм кейин билсе, сырға алтын емес екен. Судья ол адамға узақ тигилип қарап турды да: «Сиз алтын таўып алған ҳәм маған алып келип берген сол хызметкер емессең ба?» деп сорады. Ол: «Аўа, мен сол адамман», деди. Судья ҳайран болып: «Сол ўақытта айтқан сѳзиң есиңдеме?» деди. Ол: «Аўа, бирақ кейиншелли менде ҳәмме қатары сизлерге ҳәўес еттим, сизлердей жүриўге, сизлердей кийиниўге, сизлердиң үрп-әдетлериңизге еликлей басладым. Ақыр-соңы сизлердиң бириңизге айландым», деди. Судья: «Бул сизиң айыбыңыз емес, бизиң айыбымыз. Биз сиз киби динди беккем тутқан, шариат кѳрсетпелерине әмел ететуғын, ақыретин ойлап, дүнья байлықлары арзымас нәрсе екенлигин сезиўши емес едик. Сизлерге үрип-әдетлеримизди тарқаттық, оны шырайлы етип кѳрсеттик. Нәтийжеде диниңизди умыттыңыз, ийман-исенимиңизден, әдетлериңизден ўаз кештиңиз ҳәм мине усындай жеркенишли аўҳалға келдиңиз», деди де жылап жиберди.

islam.uz сайтынан Даўытбай Беканов таярлады.
  • 118 мәрте оқылды

Paziylet.uzҚарақалпақстан мусылманлары қазыяты веб-сайты