Ғәплетте қалмаң! Бир жыллық гүнәлар кешириледи ҳәм бир жыллық берекет бериледи

Еслетпе! 2019 жылдың 31 август күни - жаңа 1441 ҳижрий жыл Муҳаррам айы басланыўының 1-күни. Ашура күни 2019 жылдың 9 сентябрь, дүйшемби күнине туўры келеди.

Муҳаррам айы қандай ай? Муҳаррам айы - мусылманлар календарының биринши айы. Бул ай Аллаҳ таала урыс, қан төгиўди ҳарам еткен (Зулҳижжа, Зулъқада, Муҳаррам, Ережеп) төрт айдың бири болып, оның оныншы күни яғный, ашура күни өз алдына пазыйлетлерге ийе.

Ашура қандай күн? Бул күн ҳаққында Набий алайҳиссалам: “Бул сондай жақсы күн, бул күнде Аллаҳ Бани Исроилды душпанларынан қутқарған. Сол себепли Муса алайҳиссалам бул күнде ораза тутқан. Мен Мусаға көбирек (жақын болыўға) ҳақылырақпан”, деди ҳәм ол күнде ораза тутып, адамларды да оның оразасын тутыўға буйырды” (Имам Бухарий рәўияты).

Ашура күни қандай пазийлетлерге ийе? Бул күн ораза тутыў өткен бир жыллық гүнәҳларға каппарат болады. Бул ҳаққында Расулуллаҳ саллаллаҳу алайҳи ўа саллам: “Ашура күниниң оразасы - Аллаҳтан үмит етемен - бир жыл алдыңғы гүнәларға каппарат болады”, деген (Имам Муслим рәўияты).

Бул күн жақынларға кеңшилик етиў, бир жыллық кеңшиликке себеп болады. Абу Саьд разияллаҳу анҳудан рәўият етиледи. Набий алайҳиссалам: “Ким Ашура күни ҳаялына саўға берсе, Аллаҳ жылдың барлық ўақтында оған да саўға береди”, деди (Имам Байҳақий рәўияты).

Суфён ибн Уяйна раҳматуллаҳи алайҳ: “Бул ҳәдисти алпыс жыл тәжирийбе еттим ҳәм тек ғана жақсылық көрдим”.

Ашура күнин Расулуллаҳ саллаллаҳу алайҳи ўа саллам қалай өткерер еди? Расулуллаҳ саллаллаҳу алайҳи ўа саллам бул күнди өткерип жибермеў ушын қатты ҳәрекет қылатуғын еди, оның саўабына ерисиў ушын бул күнниң келиўин ынтықлық пенен күтер еди. Бул ҳаққында Ибн Аббас разияллаҳу анҳу айтады: “Расулуллаҳ саллаллаҳу алайҳи ўа салламды Ашура күни оразасын басқасынан абзал көрип, сағынып, Рамазан айы оразасын күтип сағынғандай, басқа күн ҳәм ай оразасын күткенин көрмедим” (Имам Бухарий, Имам Муслим рәўияты).

Есте тутың! Муҳаррам айының жалғыз оныншы күнинде емес, бәлки бул күнге қосып, бир күн алдыңғы ямаса бир күн кейинги күнде де ораза тутыў керек.

Абдуллаҳ ибн Аббас разияллаҳу анҳу рәўият етеди: Расулуллаҳ саллаллаҳу алайҳи ўа саллам Ашура күни оразасын тутып, адамларды да бул күнниң оразасын тутыўға буйырғанда, саҳабалар: “Я, Расулуллаҳ! Бул күн еврей ҳәм насраныйлар уллығлайтуғын күн-ғо!” дейди. Сонда Расулуллаҳ саллаллаҳу алайҳи ўа саллам: “Аллаҳ қәлесе келеси жылы тоғызыншы күни де тутамыз”, деди. Бирақ, келеси жыл келместен Расулуллаҳ саллаллаҳу алайҳи ўа саллам әлемнен өтти (Имам Муслим рәўияты).

Даврон НУРМУҲАММАД. Muslim.uz сайтынан Нөкис қаласы Ережеп бий жоме мешити имам-хатиби Набатов Аминжан аўдармасы.

  • 122 мәрте оқылды

Paziylet.uzҚарақалпақстан мусылманлары қазыяты веб-сайты