Жупты ҳалал табыўда асықпайық...

Биз билемиз қыз бенен бала ержеткеннен соң турмыс қурыў мәселеси жүзеге келеди. Турмыс саўдасы болғаннан соң, ол инсанның қандай екенин, шаңарағы ата-анасының ким екенин билиў әҳмийетли. Өйткени ата-ананың ҳәм перзентлериниң қәлеўи менен еки жас бир өмирлик жолдас болады.

Бундай жүдә қыйын ҳәм машақатли иске инсан кең пикирлеп, ойланып ис тутпаса қәтеликке жол қойыўы тәбийий.

Аллаҳ таала биз мусылман бенделерине салиҳ жубай ҳәм жақсы перзент сораўдың дуўасын өзи үйреткен:

«Аллоҳумма ҳаблана мин азўәжина ўә зүррийятина қуррота аъюнию ўа жаъална лийл муттақийна имәма».

Бүгинги күнде турмыста гүўасы болып атырмыз, айрым ата-аналар перзентлериниң ертеңги күнин ойламастан өзлериниң мәплерин, жумысының жолға түсип, алға илгерилеўин гөзлеп, нешше жылдан берли асырап-абайлап өсирип киятырған, көзиниң қарашығы болған перзентлерин қурбан қылады. Базы ата-аналар қызынан яки баласынан сорап отырмастан мына қызға үйленесең ямаса мына балаға турмысқа шығасаң деп мәжбүрлеп атырғанлары да турмысымызда ушырап турады.

Шәриятымыз көрсетпесине көре, ержеткен қыздың рухсатысыз ҳеш ким оның тәғдирин шешиўге ҳақлы емес, ҳәттеки ата-анасы болса да. Туўры бизлердың минталитетимизде ата-анаға деген муҳаббат, сыйласық, айтқанларын орынлаў деген әжәйып бир ислер жоқары дәрежеде турады. Бирақ турмыс қуратуғын сиз жаслар болғаныңыздан соң, ҳәр тәреплеме ойлап кейин мәсләҳатлесип, соң жуўмақ шығарған мақул. Билемиз ата-аналарымыз бизлерге жаман нәрсени раўа көрмейди. Тек ғана перзентлерим бахытлы болсын деп ертеңги күнин ойлайды. Соның ушын да ҳәр тәреплеме ата-ананың гәпи ҳәм өзиниң жеке пикиринен келип шығып, ойласқан ҳалда жуўмақ шығарыў керек. Өйткени турмыс қурыў ойыншық, ҳәзил ис емес...

Ертеңги күниңизди кимге исенип, тапсырып атырғаныңызға қараң, және адасып қалып, перзентлердиң жетим болыўына себепши болмаң!

Ҳайтмурат Ережепов. Имам Бухарий атындағы Ташкент ислам институты 2-курс талабасы.

  • 266 мәрте оқылды

Paziylet.uzҚарақалпақстан мусылманлары қазыяты веб-сайты