Жасларымызды социаллық иллетлерден асырайық

Жǝмийеттиң раўажы жасларымыздың ақлый, илимий ҳǝм физикалық санасына байланыслы екенлиги мǝлим. Әсиресе жǝмийетимиз турғынларынын салмақлы үлеси жаслардан ибарат болған журтымызда бул мǝселениң ǝҳимийети жүдǝ үлкен. Әлбетте, Ўатанымыздың ҳǝр тǝреплеме раўажланыўына үлес қосатуғын жаслар ѳз-ѳзинен жетисип шықпайды. Солай екен олардың тǝлим-тǝрбиясы менен шуғылланыў, билим-мǝрипатқа қызықтырыў ушын керекли шараятты жаратып бериўимиз керек болады. Соның менен бирге жасларды жоқары мақсетлерден шалғытатуғын жаман иллетлерден қорғаў шаръий миннетимиз. Пайғамбарымыз алайҳиссалам мүбǝрек ҳǝдиси шǝрифлериниң биринде «Жақсы сǝўбетлес пенен жаман сǝўбетлес, мүшк ануар сатыўшы менен темиршиниң басқынына уқсайды. Мүшк анўар сатыўшы ǝтиринен саўға қылыўы яки оннан сатып алыўын, ҳеш болмаса ǝтирдиң ийисинен лǝззетлениўи мүмкин. Ал темиршиниң басқыны болса кийиминди күйдиреди, болмаса ашшы түтини мурнынды ашытады» деди (Имам Бухарий рǝўияты). Инсан ѳмири оның ең бийбаҳа байлығы мине усы байлықты ысырап қылған, оннан үнемли пайдалана алмаған кимсе еки дүньяда да абырай таппайды. Әлбетте Аллаҳ таала инсанға үлги аларлық ѳмир береди, бирақ бул ѳмирди бийкарға ѳткериў ақыбетинде қатты пушайманлықты алып келеди. Бул ҳаққында Аллаҳ таала Қурани кǝриймде: «Олар ол жерде: «Я Рәббимиз, бизлерди (азаптан) шығар – бизлер ислеген әмеллеримизден басқа, ийгиликли ислер қыламыз!» – деп қышқырады. «Сизлерге еслейтуғын адам еслейтуғындай өмир бермеген бе едик?! Сизлерге ескертиўши (пайғамбар да) келген еди ғой!…», деп марҳамат қылынады (Фатир сүреси, 37-аят).

Пайғамбарымыз алайҳиссалам жаслық адамның кǝмиллик, кѳплеген жетискенликлерге ерисетуғын ўақыты екенлигин айтып былай дейди. «Бес нǝрсени бес нǝрседен алдын ғаниймет бил: кекселиктен алдын жаслығыңның, кесел болмастан алдын саламатлығыңның, жарлылықтан алдын байлығыңның, бǝнтлигиңнен алдын бос ўақытыңның, ѳлимнен алдын тирилигиңди ғǝниймет бил (Имам Термизий ҳǝм Имам Байҳақый рǝўият қылған). Демек жасларымыз ѳмириниң бǝҳǝри болған дǝўирди бийкаршы ойын-күлки ҳǝм гүнаҳ ислер менен емес, бǝлким илим-билим ҳǝм кǝсип-ѳнер ийелеў, ибадат ҳǝм саўаплы ислер менен ѳткериўи керек. Ѳтмиште аты шыққан бǝрше уллылар жаслығын ғǝниймет билген, сол дǝўирде керекли билим ҳǝм тǝжрийбени ѳзлестирген. Жаслардың ǝдеп-икрамы, тǝлим-тǝрбиясы, илим мǝрипаты менен ҳǝр бир ата-ана ҳǝм ҳǝр-бир жуўапкер шахслар шуғылланса, келешекте бизиң перзентлеримизден уллы бабаларымыз Имам Бухарий, Имам Мотуридий, Әлийшер Наўайы, Харезимий, Ибн Сино, Фағаныйдай уллы алымлар шығады.

Пайғамбарымыз саллаллаҳу алайҳи ўасаллам ҳǝдиси шǝрифте «Әке ѳз перзентине шырайлы ǝдептен кѳре жақсырақ нǝрсе бере алмайды» (Имам Термизий) рǝўияты. Аллаҳ таала жасларымызды камалатқа жетисиў, руўхый ҳǝм физикалық жақтан жетик болыўын, ийман инсаплы, кǝмил инсан болыўын несийп қылсын. Ата-анаға ҳǝмийше алғыслар келтириўин миясар ǝйлесин! Әмийн!

Арзыубай Юсупов, Кегейли районы «Искендер ҳǝм Алаўатдин ийшан» жоме мешити имам-хатиби.
  • 56 мәрте оқылды

Paziylet.uzҚарақалпақстан мусылманлары қазыяты веб-сайты