Умытылып баратырған сүннетлер (7-сүннет): Мисўǝк ислетиў

Айша анамыз разияллаҳу анҳа айтады: “Расулуллаҳ саллаллаҳу алайҳи ўасаллам үйге киргенде биринши болып мисўǝк тутар еди” (Имам Муслим рәўияты).

Абу Ҳурайра разияллаҳу анҳудан рәўият етиледи. Расулуллаҳ саллаллаҳу алайҳи ўасаллам: “Мисўǝк ислетип оқылған еки рǝкат намаз мисўǝксыз оқылған жетпис ракат намаздан абзалдур”, деген (Имам Ибн Нажжар рәўияты).

Айша разияллаҳу анҳадан рәўият етиледи. Расулуллаҳ саллаллаҳу алайҳи ўасаллам: “Мисўǝк аўызды пәклеўши ҳәм Аллаҳты разы етиўшидур”, деди (Имам Бухарий, Имам Насаий рәўияты).

Мисўǝк тис етлерин қуўатлы етеди. Тис тасларын, аўыздағы жағымсыз ийислер ҳәм бактерияларды жоғалтады. Еслеў қǝбилетин беккемлейди, инсанның сөйлеў шеберлигин туўырлайды. Көз нурын айқынластырады, ас қазан-ишек кеселликлериниң алдын алады.

Қараң, бул оғада аңсат, бирақ саўабы үлкен, гүналарды кеткизиўши, жәннетке жетеклеўши болған әмел болып табылады. Бирақ ериншеклигимиз, шалағайлығымыз ақыбетинде буған итибар бермеймиз, әмел етпеймиз. Көпшилигимиз ҳәтте билмеймиз де. Алдын билмесек, енди билип алдық. Енди билгенимизге әмел етейик ҳәм басқаларға да жеткизейик.

Яғный, Расулуллаҳ саллаллаҳу алайҳи ўасалламның сүннетлериниң ен жайыўына хызмет етиў оған болған муҳаббат ҳәм сыйласықтың жоқары үлгиси есапланады. Пайғамбарымыз саллаллаҳу алайҳи ўасаллам ѳзиниң сүннетлерин анықлық пенен жеткезгенлердиң ҳаққына: “Мениң гәпимди еситип, ядлап, түсинип, кейининен жеткизген адамды Аллаҳ сыйласын”, деп дуўа еткен (Имам Термизий рәўияты).

Келиң, биз де Расулуллаҳ саллаллаҳу алайҳи ўасалламның сүннетлерине муўапық мǝжилистен турғанымызда дуўа етиўди умытпайық.

Аллаҳ таала бәршемизге ҳәр бир исте Расулуллаҳ саллаллаҳу алайҳи ўасалламның сүннетлерине әмел етиўимизди несийп етсин, ǝмин!

Аллаҳумма солли ўа саллим ъала Муҳаммадин ўа ъала али Муҳаммад

Даврон НУРМУҲАММАД

Muslim.uz сайтынан Нѳкис районы «Имаматдин ийшан» жоме мешити имам-хатиби Дǝўлетбай Алимбетов таярлады.

  • 86 мәрте оқылды

Paziylet.uzҚарақалпақстан мусылманлары қазыяты веб-сайты